Armañongo Parke Naturala (Turtzioz) – Gorria

⚠️ OHARRA: ibilbidea egiteko, ordezko oinetakoak eta kopetako linterna eramatea gomendatzen da.

Ibilbidea Armañongo Parke Naturaletik igarotzen da, Turtzioz eta Karrantza udalerrien artean hedatzen dena, baina oraingo honetan Turtziozen soilik ibiliko gara.

Ibilbidea bi modalitatetan banatu dugu: berdea, errazagoa, eremu teknikorik gabea eta desnibel txikiagokoa, eta gorria, hainbat tarte tekniko dituena. Edonola ere, bi ibilbideen trazadura berdina da gehien bat.

Cuetoko zezen-plazan, Armañon eta Los Jorrios aldera igotzen den errepidea hartuko dugu, asfaltoan aurrera eginez. “Armañon” dioten ikurrei jarraituko diegu, bideko lehenengo iturriaren ondoan dagoen pasabide kanadar bat aurkitu arte.

Hormigoizko pista batetik gora jarraituko dugu, harri zurizko biltegi txiki batera iritsi arte. Han, bidezidor txiki bat hartuko dugu, harrizko horma baten ondoan dagoena. Bideak etxola bateraino eramango gaitu (horrela hormigoia saihestuko dugu).

Etxola atzean utziko dugu, eta bidezidor batera iritsiko, jarraibideei jarraituz (zuri-gorri-horia), depositu batera iritsi arte. Bertan, hormigoizko pistarekin bat egingo dugu berriro, beste etxola batetik igaro ondoren.

Gora egiten jarraituko dugu, Armañon aurrean eta Los Jorrios eskuinean ditugula, bigarren iturri batera iritsi arte. Gero, markatutako pista utzi eta kanal bat duen bidexka bat hartuko dugu (X gorri eta zuri batez seinaleztatutako hesi bat igaro ondoren).

Ia 1,5 km egin ondoren, bidearen puntu berezienetako batera iritsiko gara: Los Jorrios gailurra zeharkatzen duen tunelaren (1 km inguru) ahora. Zeharbideak Remendon basoraino eramango gaitu eta, iluntasuna dela-eta, kopetako linterna eramatea gomendatzen dugu.

Tuneletik atera ondoren, baso betean, zuhaitzez inguratutako bidezidor batetik aurrera egingo dugu, zirkuituen lehen bidebanatzera iritsi arte. Zirkuitu berdeak Armañongo Parke Naturalaren ingurura eramango gaitu, basotik urrunduz. Zirkuitu gorriak, berriz, etxola eraitsi bat eta harkaitzezko pasabide estu bat utziko ditu atzean, Galupako gailurrerantz (hainbat dolmen agertuko zaizkigu bidean).

Zirkuitu gorriak La Galupatik Armañonera egin bitartean, zirkuitu berdea basotik irtengo da. Bidegurutze batean elkartuko dira eta, puntu horretan, Armañon gailurrerako igoerari ekingo diogu.

Behin pasabide kanadar batera iritsita, zirkuitu gorriak Armañon gailurreranzko hesiaren pareko igoera hartuko du; zirkuitu berdeak, berriz, Armañongo aterperaino eramango gaituen pista batetik inguratuko du gailurra.

Bi zirkuituek, Los Jorrios begi-bistan izanda, aurrera egingo dute elkartu arte, eta han helmugaraino eramango gaituen pista hartuko dute.