Zugaztieta

Enkarterriko ekialdea ezagutzeko eta Bilboko hiria txori-begi bistan ikusteko aukera emango digun ibilbide ikusgarria. Ibilbideak Galdamesen du hasiera. Galdamesko mendiak betidanik egon dira burdina-mineralaren erauzketarekin eta tratamenduarekin lotuta; jarduera horrek udalerriaren orografia erabat eraldatu zuen, eta paisaia hunkigarriak moldatu. Arenatza kobazuloak eta bertan islatutako pinturek osatzen dute inguruko elementu arkeologikorik esanguratsuena. Horrela, Arenatza labar-artearen laginak dituen Bizkaiko laugarren haitzuloa da.

Ibilbidea iparralderantz joko du desnibel gutxirekin, Euskal Herriko Meatzaritzaren Museora iritsi arte. Museoaren xedea Euskadiko (eta, bereziki, Bizkaiko eta Meatzaldeko) meatzaritzaren kultura eta historia ikertzea eta zabaltzea. Museoa irabazi asmorik gabeko erakundea da. 1986an sortu zen, Meatzaritza Museoaren Kultur Elkartea sortu zen urte berean, gizarte-ekimen batetik. Elkarte hori, besteak beste, meatzari ohiek eta siderurgiako beste langile ohi batzuek osatu zuten; garai hartako industria-krisi larriaren ondorioz, ordura arte Bizkaiko funtsa izan ziren elementuak baztertuta gelditzen ari zirela ikusita sortu zuten elkartea.

Ibilbideak gorantz jarraituko du, Zugaztieta herri mitiko eta historikora iritsi arte, burdina erauzten zen tokietako batera. Meategi zaharrak bisitatu beharreko berdegunez inguratutako urtegi artifizialak dira gaur egun. Zugaztieta atzean utzita, Meaztegi golf zelaitik gertu igotzen jarraituko dugu Peñas Negras Ingurumen Interpretazioko zentrora iritsi arte, lurzoruaren ustiapenaren ondorioz inguruneak jasandako eraldaketa sakona hautemateko. Ibilbideak Gasterantz gailurreraino igotzen jarraitzen du. Hemendik, jaitsiera azkar bati ekingo diogu, eta abiapuntura (Galdames) itzuliko gara.